Soeal Palestina

Laporan: Tisa
Rabu, 14 Agustus 1929 | 11:30 WIB
1. Tentara Inggris di Jeruzalem goenaken tembok kota toea sebagi lobang perlindoengan waktoe bertempoer terhadep pembrontak orang Arab (Monash University Library's Asian Collections)
1. Tentara Inggris di Jeruzalem goenaken tembok kota toea sebagi lobang perlindoengan waktoe bertempoer terhadep pembrontak orang Arab (Monash University Library's Asian Collections)

SinPo.id, SEBAGAIMANA orang taoe soeal Palestina sampe sekarang mast teroes rongrong Groot Brittannie. Singa Inggris jang soeda ditarik boentoetnja di Laoetan Tengah, ditjaboet koemisnja di Ti-moer Djaoe, dan ditampar moeka-nja di Europa Tengah, teroes tinggal diam tida melawan, sekarang terpaksa kasi liat gigi dan koekoenja pada orang-orang Arab jang melawan pada autoriteit Inggris di Palestina. Tapi djoega bagi Groot Brittannie ada serba soesa, boeat berlakoe terlaloe bengis di Palestina aken bikin sjak hatinja semoea orang Arab, kerna Groot Brittannie jang soeda berlakoe lemah terhadep fihak loear aken djadi katjiwa sekali kaloe tjoema gaga perkasa terhadep pendoedoek negri di bawah pamerentahan Inggris sendiri ; tapi sebaliknja djika berlakoe keras kapalang tanggoeng, orang Arab jang brontak di Palestina aken djadi semingkin brani. Adalah ini keadahan jang bikin pergolakan di Palestina teroes berdjalan sampe sekarang, dan kadoedoekan di itoe tempat kabarnja semingkin roesak. 

    Biar bagimana ada baek djoega orang katahoei doedoeknja jang betoel tentang soeal Palestina, dan Mr. Joseph Martin ada bikin  penoetoeran jang ringkes tapi tjoe-koep terang seperti brikoet: 

    Sadjek orang Arab serang orang Jahoedi di Wailing Wall (Tembok peranti menangis), jalah tempat soetji dari orang Jahoedi, di Jeruzalem boelan Augustus 1929, kadoedoekan di Palestina teroes djadi semIngkin djelek. Tentang perkara boenoe jang beroelang-oelang dilakoeken oleh orang Arab lama-lama mendjadi pembrontakan-pembrontakan ketjil tapi diorganiseer oleh berbagi-bagi pemimpin pembrontak. lni rombongan-rombongan pembrontak jang saban-saban timboelin hoeroe-hara achirnja bersariket mendjadi pasoekan revolutionair Arab jang bersendjata dan diorganiseer. Boeat tindes actienja itoe pasoekan revolutionair Arab, fihak Inggris semingkin lama goenaken semingkin banjak tentara.

    Sekarang di Palestina terdjadi sematjem paperangan. Dalem tiga boelan Augustus, September dan October ini taon, zonder mengitoeng orang-orang pembrontak Arab jang binasa dan loeka waktoe bertempoer, soeda ada 29 orang Inggris, 144 orang Jahoedi dan 231 orang Arab jang binasa, dan 75 orang Inggris, 232 orang Jahoedi dan 179 orang Arab jang loeka dalem berbagi-bagi pertempoeran. Samentara itoe pamerentah Inggris teroes berdaja mentjari djalan bentoek beresken doea kainginan jang saling berlawanan antara pendoedoek Arab dan pendoedoek Jahoedi. 

    Asal oesoelnja soeal Palestina jang sekarang adalah itoe „Declaratie dart Balfour" jang pertama dioemoemken pada doea poeloe satoe taon jang laloe. Doea artikel jang teroetama dari itoe declaratie ada membilang bahoea pamerentah Inggris ada moefakat tentang ber-diriken tempat tinggal nationaal, tegesnja negri, orang Jahoedi di Palestina; tapi moesti dikatahoei terang bahoea tida belch dilakoeken apa-apa jang meroegiken hak-hak, civiel atawa igama, dari pendoedoek jang boekan Jahoedi. Ini declaratie telah disetoedjoein eleb. President Wilson almarhoem dan Amerika Sariket dan oleh pamerentah-pamerentah Fransch dan Italiaansch. Satoe mandaat boeat pegang pamerentahan di Palestina blakangan dikasiken pada Groot Brittannie oleh Volkenbond dengen setoedjoenja Amerika sariket. Dari itoe soeal Palestina sabetoelnja tida tjoema menjangkoet pada pamerentah Inggris, orang-orang Arab dan Jahoedi sadja, hanya pada Volkenbond dan pamerentah Amerika Sariket.

   Tapi tida beroentoeng, itu pengharepan bahoea orang-orang Arab dan Jahoedi nanti bisa saling tjotjokin marika poenja kapentingan-kapentingan jang berlawanan dalem satoe tjara hingga satoe pamerentahan zelf-bestuur bisa ditjiptaken soeda tida kasampean. Samentara itoe, di satoe fihak pamerentah Inggris dapet desekan jang semingkin keras boeat tjariken tempat tinggal bagi orang-orang Jahoedi jang dioesir dari negri-negri jang anti-Jahoedi di Europa dan djoemblahnja bertambah besar; .di laen fihak antara orang Arab soemanget nationalisme soeda djadi semingkin bertenaga dan marika semingkin koeatirin Palestina poenja nasib politiek di kamoedian hari. Selaennja ini ada lagi soeal-soeal financieel, economisch dan politick jang berbagi-bagi sifatnja.

     Satoe commissie jang diangkat pada doea taon jang laloe boeat preksa soeal pembrontakan-pembrontakan orang Arab di Palestina soeda tarik conclusie bahoea bentrokan antara itoe doea bangsa Arab dan Jahoedi tida bisa dibikin akoer, dan madjoeken voorstel bahoea Palestina haroes dibagi mendjadi doea negri orang Arab dan negri orang Jahoedi. Orang Jahoedi masi tetap aken dikasiken tempat tinggal nationaal, aken tetapi lebih berwates dari jang marika harep;  orang Arab bisa dibikin ilang kakoeatirannja bahoea marika nanti djato di bawah ngaroe orang Jahoedi, dan bahoea marika bisa dapetken kamerdikahan nationaal. Ini Voorstel diambil dengen poetoesan semoea soeara dari itoe commissie, telah dioemoemken di tanggal 8 Juli tam 1937, dan soeda ditrima baek oleh pamerentah Inggris. Dalem boelan Maart ini taon soeda diangkat satoe commissie oeroesan membagi doea Palestina jang disoeroe selidikin bagimana haroes dilakoeken setjara practiseh itoe principe tentang bagi doea Palestina. sinpo

Komentar:
BERITALAINNYA
Koran Sin Po, 24 Maret 1928, (Monash University/SinPo.id)
Organisatie Tionghoa.
Minggu, 24 Maret 2024
Koran Sin Po 20 Maret 1926 (Monash University/SinPo.id)
“Bandjir besar di Brebes,”
Rabu, 20 Maret 2024
Koran Sin Po, 3 Maret 1928 (Monash University/SinPo.id)
Sifat nationaal dari sekola.
Minggu, 03 Maret 2024
Koran Sin Po, 19 Februrai 1927 (Monash University/SinPo.id)
Psychology dari Inggris.
Senin, 19 Februari 2024
Koran Sin Po, 6 Februari 1932 (monash University/SinPo.id
Poehoen-poelweai asing di Amerika.
Selasa, 06 Februari 2024