Boltonnderer Was Vs West Ham United

SinPo.id - Gambar di atas ada meloekisken banjaknja penonton jang sanget loear biasa dalem pertandingan final boeat reboet Football Association Cup. Ini pertandingan besar boeat pertama kali dibikin di Imperial Stadium tempat pertandingan sport jang baroe dibikin di Wembley, London.

Itoe tempat pertandingan bisa mengasi tempat boeat 125.000 penonton, tapi ternjata djaoe dari tida tjoekoep hingga penonton sebagi mana kita bisa liat, soeda mendesek ka lapangan voetbal. Lantaran ini pertandingan dibikin sasoedanja laat tiga perampat djam kerna barisan politie perloe dikasi dateng doeloe boeat gebah penonton jang teroes mendesek. Sasoedanja pintoe dari itoe Stadium ditoetoep, di loear masi ada bilang poeloe riboe orang jang tida dapet. Masoek dan antara marika ini banjak jang soeda mandjat tembok boeat merobos masoek dengen tida perdoeliken larangan politie. Sepandjang kabar, lantaran ini kakaloetan tida koerang dari doea riboe penonton jang dapet tjilaka hingga antaranja banjak jang perloe digotong ka stadsverband. Tapi broentoeng tida ada jang sampe tiwas djiwanja.

Itoe pertandingan adalah antara Bolton Wanderers dan West Ham United dan kasoedahannja 2 – 0 boeat kamenangannja jang diseboet doeloean. Radja George V. ada toeroet menjaksiken itoe pertandingan loear biasa.