Apa jang orang bisa bikin dari teer

TTEER atawa ter item (koolteer) seperti orang taoe ada barang jang bisa didapet banjak di fabriek gas dan jang warnanja item dan baoenja boesoek. Tapi pengataoean modern dan teroetama ilmoe pisa telah bisa. „soenglap” dan telah bisa robah ini barang jang doeloe diboewang sebagi restant tida bergoena djadi barang-barang jang sanget berfaedah. Benedikt dan Knecht dalem marika poenja „The Chemistry of the Coal Tar Colors” (London, 1889) dan Prof.

Launhardt dari Hanno­ver dalem iapoenja „Am sausenden Webstuhl der Zeit” oendjoek banjak sekali tjonto-tjonto dari barang-barang jang dibikin dari ter atawa berasal dari sitoe. Banjak sekali matjem warna-warna indah dan gilang goemilang bisa dibikin dari.......... ter item. Warna idjo terang, biroe toewa, merah dara, enz. enz. semoea bisa disoenglapin dari ter item dengen pertoeloengan ilmoe pisai.

Warna biroe Alizarin oepama didapetken dalem taon 1877, warna merah Primuline dalem taon 1889, warna idjo Alizarin dalem taon  1895, enz. enz. terlaloe banjak boeat diseboet satoe per satoe. Ini banjak matjem warna-warna digoenaken dalem segala matjem industrie seperti dalem fabriek soetra, dalem peroesahan batik dan sebaginja.

Jang dari ter'jang item dan boesoek orang bisa bikin warna-warna jang indah soeda ada, satoe hal jang mengheranken, tapi dari ter orang bisa bikin banjak matjem barang laen lagi. Diri ter poen orang telah bisa bikin...... saccharine, jalah sematjem goela jang 300 kali lebih manis  dari goela biasa.

Ter kaloe dimakan tentoe sadja pait sekali, tapi toch dari ini barang pait pengataoean telah bisa bikin barang jang tiga ratoes kali manisnja dari goela. Doea djoempoet dari saccharine bisa bikin barang djadi sama manisnja dengen, barang jang pake satoe pond goela biasa!

Malahan ada saccharine jang manisnja sampe 500 kali goela biasa. Boeat orang jang sakit kentjing manis jang tida boleh makan goela biasa, saccharine bisa digoenaken. Dari ter djoega orang bisa bikin saboen wangi, dan minjak wangi jang paling haroem!

Selaen dari ini dalem ilmoe mengobatin djoega banjak dipake barang-barang jang berasal dari ter. Salicylzuur dari Prof. Kolbe oepama sering di goenaken. Dr. Knorr telah mendjadi kaja sebab bikin obat Antipyrin dari ter.

Obat Phenacetin djoega berasal dari ter dan digoenaken boeat obatin sakit kepala. Amoniak, carbolzuur enz. djoega berasal dari ter； begitoepoen nahptaline. Liquor carbonis detergens dj osga ada sematjem. obat berasal dari ter jang dipake boeat semboehken penjakit koelit.

Boekan sadja dalem fabriek tjat, dan fabriek obat, tapi djoega dalem laen-laen peroesahan ter banjak kapentingannja. Warna koening bisa didapetken dari satoe bagian dari ter jang dinamaken ”pikrine”. Ini „pikrine’，djoega terpake boeat bikin obat bedil jang kaloearken sedikit asep (rookzwak kruit).

Lebih djaoe orang goenaken ter boeat bikin tinta tjitak, smeer sepatoe, enz. enz. Pembatja tentoe tida kira, bahoea dari ter orang bisa bikin begitoe poenja banjak matjem. barang jang berlaenan djaoe sekali satoe pada laen.