Saorang Tionghoa jang tjoba hidoepken peroesahan soetra di Java.

Laporan: Sinpo
Kamis, 01 Desember 2022 | 07:24 WIB
Koran Sin Po 1 Desember 1928
Koran Sin Po 1 Desember 1928

SinPo.id -  Koran Sin Po 1 Desember 1928 menulis tentang dunia bisnis, kisah warga Tionghoa yang menghidupkan produksi kain sutra.  “Salah-satoe orang jang lakoeken pertjobahan demikian ada toean Lie Kim Liong di Tangerang, jalah familie dari toean Lie Hin Liam almarhoem. Toean Lie Kim Liong tjoba hidoepken peroesahan soetra di sini di boentoetnja abad ka 19, jalah Kira-kira dalem taon 1896”. tulis laporan  Sin Po kala itu.

Tercatat bisnis kain sutra telah di Jawa saat itu telah ada 1718 hingga 1725 oleh pemerintah kolonial Gouverneur-Generaal Zwaerdecroon) dan orang-orang particulier.

***

PEROESAHAN boeat plara oeler soetra di Java dan dengen begitoe tjoba bangoenken peroesahan

soetra di sini soeda dilakoeken berkali-kali sedari djeman doeloe oleh gouvernement dan djoega oleh orang-orang particulier. Gouverneur-Generaal Zwaerdecroon (1718—1725) ada salah-satoe orang jang berichtiar ka ini djoeroesan dan iapoenja ichtiar boeat hidoepken industrie soetra di sini diteroesken oleh laen-laen G. G. sampe dalem taon 1738.

Tapi orang masi belon merasa kapok dan di Java dan djoega di Sumatra orang adaken pertjobahan-pertjobahan teroes dengen tida mjang tempo dan oewang. Salah-satoe orang jang lakoeken pertjobahan demikian ada toean Lie Kim Liong di Tangerang, jalah familie dari toean Lie Hin Liam almarhoem. Toean Lie Kim Liong tjoba hidoepken peroesahan soetra di sini di boentoetnja abad ka 19, jalah Kira-kira dalem taon 1896.

Boeat ini maksoed ia telah goenaken boekan sedikit kasabaran, tenaga dan oewang dan boeat djaga di moeka soepaja iapoenja maksoed tida gagal ia telah adaken roepa-roepa experiment jang loeas. Toean Lie Kim Liong ada poenja tanah jang ditanemin teboe dan djoega ada poenja fabriek goela ketjil.

Tanah-tanah jang koerang tjotjok boeat teboe digoenaken boeat tanem poehoen moerbei boeat piara oeler soetra dan ini poehoen didapetken dari bekas kebon moerbei pamerentah di Tjibadak. Iapoenja fabriek goela ia telah rombak mendjadi fabriek boeat bikin soetra dan goedang-goodang jang loeas dipake boeat piara oeler-oeler soetra. Bagimana soenggoe hati toean Lie Kim Liong bekerdja poen bisa ternjata dari iapoenja poetoesan boeat peladjarken bahasa Inggris special soepaja ia bisa pesen sendiri pekakas-pekakas boeat bikin soetra di Engeland.

Djoega ia adaken bengkel boeat betoelken pekakas-pekakas jang digoenaken dalem iapoenja fabriek soetra pertjobahan. Sebab pekakas-pekakas jang dipesen dari Engeland menoeroet prijscourant tida sampe dengen lekas disini, hingga toean Lie Kim Liong djadi moesti toeloeng dirinja sendiri sabelonnja barang jang dipesen sampe di sini.

Poehoen moerbei di waktoe moesim kering ilang daonnja dan lantaran ini ia tjoba tjari laen poehoen sebagi gantinja poehoen moerbei boeat samentara waktoe sebab boleh djadi ia tida taoe telor-telor soetra bisa disimpen doeloe dalem kamar dingin seperti di Europa di waktoe moesim dingin, jalah di waktoe poehoen moerbei ilang daonnja.

Djoega ia adaken pertjobahan boeat dapet toeroenan oeler soetra jang baek, jalah jang tida begitoe gampang dapet sakit. Boeat ini maksoed ia sampe kasi dateng telor-telor soetra dari Spanje, Italie Oetara dan Frankrijk Selatan, boeat apa ia tentoe sadja moesti kaloearken ongkos boekannja sedikit. Iapoenja peroesahan soetra di Tangerang ia namaken „The Java Silkworm Nursery”.

Ampatpoeloe bouw tanah ia goenaken boeat tanem poehoen moerbei dan ia tadinja niat bikin loeas ini sampe 500 bouw sebab iapoenja pertjobahan boekan tida berhasil sama sekali. Sebab soetra jang ia bikin dapet poedjian tinggi dalem berbagi-bagi tentoonstelling di Europa. Fabrikant-fabrikant soetra di Lyon (Frankrijk) dan djoega soedagar-soedagar soetra Tionghoa dan Japan itoe koetika poedji soetra bikinan toean Lie Kim Liong.

Tapi soenggoe sajang itoe peroesahan jang menelan boekan sedikit kapitaal blakangan tida bisa diteroesken. Orang jang sering denger tentang pertjobahannja toean Lie Kim Liong di Tangerang boeat piara oeler soetra tentoe banjak jang kira itoe tjoema pertjobahan saparo memaen sadja, tapi sabetoelnja itoe experiment dilakoeken setjara jang soenggoe hati, hingga boekan salahnja toean Lie Kim Liong, kaloe itoe peroesahan tida bisa berhasil sebagimana diharep.

 sinpo

Komentar: