Nasib katemoe nasib.

DENGEN mengadepin djendela dan memandang pada goenoeng Gede di sala-satoe kota di Preangan, pada soeatoe hari satoe njonja jang ellok dan masi moeda sekali berdiri dengen paras sedi dan aer mata melele, seperti djoega aer oedjan jang itoe waktoe toeroen dari talang boeat membasmi boemi.

Diliat dari keadahan roemahnja jang diperabotin mentereng, orang tentoe merasa pasti njonja- mioeda ini merasa soesa boekan lantaran kakoerangan sandang-pangan, apalagi kaloe orang melirik pada kadoea lengannja jang terhias oleh gelang mas teretes barlian sedeng satoe leontine tertaboer barlian mengglantoeng pada lehernja jang djoendjang dan poeti-moeloes.

En toch Pik Hwa, begitoe namanja ini njonja-moeda, merasa sedi. Tangannja menggenggem sapoetjoek soerat jang roepanja ia baroe trima. Pik Hwa memandang pada goenoeng Gede jang sekarang tertoetoep oleh pedoet jang tebel dan kamoedian toendoek boeat batja poela itoe soerat jang begini boenjinja: Pik Hwa jang tertjinta, Tjoema tinggal 2 x 12 djam lagi kita orang terpisa boeat nanti kita orang berkoempoel selama-lamanja. Oh, rasanja djam-djam jang akoe liwatin ini ada terlaloe lama, padahal djam itoe sama pandjangnja.

Memang manoesia ada machloek jang aneh. Dalem waktoe soesa atawa sedeng mengharep-harep, satoe djam jang tjoema terdiri dari 60 menit, rasanja seperti mempoenjain 600 ja, kadang-kadang 6000 menit, tetapi dalem rasa beroentoeng, djam itoe-itoe djoega rasanja tjoema 6 menit atawa seperti menjambernja kilat di oedara.

Akoe dan kaoe soeda boekan teritoeng golongan pamoeda dan pemoedi lagi jang bisa kalelap dalem madoe pertjintahan, aken tetapi aneh soenggoe itoe satoe perkatahan „tjinta”. Tjinta tida mengenal toea atawa moeda, siapa jang terkena itoe, jang toea merasa dirinja djadi moeda kombali dan terkadang berlakoe sama gendengnja seperti djedjaka jang lagi rindoe.

Aken tetapi kita haroes sedar dalem mengimpi, Pik! Kita moesti merasa seperti doea petjahan kapal jang terpoekoel oleh geloembang pengidoepan dan terdampar di pasisir katentreman, dimana petjahan- petjahan ini nanti tersamboeng poela boeat meroepaken satoe kapal atawa sedikitnja satoe praoe dengen mana kita aken bertolak di samoedra-tenang, loepaken apa jang soeda liwat, memikirken hari kamoedian dan memoehoen Thian poenja berkah.

Tadi pagi akoe liat ditjabang poehoen roos jang ada di kebon’koe sepasang boeroeng jang bertjoemboe-tjoemboean dan sepasang koepoe-koepoe jang berteribangan, saolah-olah ini mendjengekin akoe jang bersendirian. Akoe djadi inget lagi pada Adam di Taman Firdaoes, sabelonnja, dapet E v a boeat kawan- idoepnja.

Ia poen ‘meliat berdjenis-djenis binatang berpasang-pasangan, liwat di hadepannja, sedeng Adam sa’at itoe sebatang-karang. Dalem hatinja Adam itoe berkata: „Kenapa binatang mempoenjain kawali boeat diadj ak bertj akep-tj akepan, sedeng akoe tida? Toehan bersifat moerah dengen membikin E v a dari toelang iganja, A d a m. Di djeman modern Toehan poen tida loepaken pada oematnja jang merasa kasepian seperti akoe ini.

DIA poen telah mengoetoes kaoe, Pik Hwa, boeat mendjadi kawan idoep’koe. Tjoema Eva-koeno dan Evamodern ada bedanja. Eva-koeno masi bisa tergoda oleh Setan, lantaran koerang pengalaman, tetapi Eva-modern ini ada, satoe prampoean jang soeda alamken pait-getir pengidoepan soeami-istri, seperti djoega Adam-modern rasaken itoe matjem kagagalan-idoep. Kita orang seperti nasib katemoe nasib, djanda katemoe doeda.

Hati-patah katemoe hati-patah, maka dari itoe kita pertjaja jang kita aken sama-sama itjipken kaberoentoengan jang tadinja terilang bagi kita berdoea. Akoe toetoep akoe poenja lamoenan sampe di sini dan biarlah kita nanti berdjoempa satoe pada laen dalem kagoembirahan jang tah dapet ditaker dengen segala takeran doenia. Ingetlah senantiasa pada’koe.