TIONGKOK

Satoe peladjaran.

Sakean lama di TIongkok timboel paperangan dalem negri, perklaian - perklaian jang telah dipertoendjoeken oleh itoe orang orang militair jang ba-risannja katanja ada terpeladjar model baroe belon perna ada jang begitoe menarik hati seperti pertempoeran-pertempoeran antara tentara expeditie dari Selatan dengen pasoekan Oetara sekarang ini. Dalem sakedjep tempo sadja tentara Woe Pel Foe jang berdjoembla poeloean riboe dengen gampang telah dibikin antjoer oleh barisan nationalist, poen pasoekannja Sun Chuan Fang jang terdiri lebih dari saratoes riboe soldadoe dan diperlengkepin alat sendjata dengen baek, achirnja moesti menjerah kala djoega. Tentang kasoedahannja ini paperangan di Kiangsi ternjata ada djadi pembitjaraan dalem kalangan militair, teroetama tentang moeslihat perang jang dipake oleh kadoea fihak.

Dari ini paperangan marika telah beroleh satoe peladjaran penting, jaitoe atas marika poenja mendoesin jang di ini masa moeslihat perang tjara doeloe soeda tida boleh dipake lagi. Doeloe dikira orang perang soeda tjoekoep dengen adoe banjak banjakan soldadoe, jang mana poenja lebih banjak tentara tentoe gampang dapet kamenangan, tapi taktiek perang jang dipake oleh pasoekan expeditie ini kali telah bikin marika mendoesin tentang kliroenja itoe anggepan.

Boeat perang di ini djeman, soldadoe - soldadoe jang disoeroe berklai tida boleh tjoema diadjar sadja bagimana tjaranja manembak dengen senapan, hanja didikan militair moesti dibriken tjoekoep soepaja iaorang tida terlaloe mengandel pada marika poenja officier, sedeng officiernja moesti dapet peladjaran tjoe- koep tentang ilmoe perang setjara baroe. Inilah ada diakoe sendiri oleh offlcier-officier dari pasoekannja Sun Chuan Fang jang telah kalah perang bahoea dalem hal terseboet pasoekan Oetara ada kalah djaoe dengen tentara Selatan, maka poen kasoedahannja fihak ini jang dapet kamenangan.

Biarlah ini peladjaran bikin semoea kaoem militair djadi mendoesin bahoea soldadoe itoe tida goena dipiara banjak-banjak kaloe tida terdidik betoel, hanja jang paling perloe jalah peladjarannja.