Advertentie dan pembeli

ADVERTENTIE semingkin lama semingkin dimengarti kapentingannja oleh kaoem soedagar dan pelahan-pelahan advertentie djadi satoe „ilmoe” penting boeat tarik perhatiannja pembatja. Orang-orang terpeladjar tinggi sebagi psychologen terkenal tida merasa dirinja terlaloe tinggi boeat lakoeken djoega pamereksahan boeat dapet taoe advertentie bagimana jang paling menarik mata manoesia, jang londjong atawa sikak, jang boender atawa tiga pasegi, jang ditaro di podjok kiri atas atawa podjok kanan bawah enz. enz.

Ini semoea „Sin Po” soeda perna toetoerken, hingga tida perloe di oelangken disini. Teroetama di Barat advertenties semingkin menarik hati lantaran pake roepa-roepa warna dan goenaken tekst jang ringkes tapi menarik dan boekan obrolan pandjang lebar jang bikin orang mengoewap dan ngantoek.

Tekst advertentie menoeroet bebrapa achli moesti ringkes, pendek seperti commando soepaja hasilnja seperti kilap jang mendadak menjamber. „Tjerita pendek" tempatnja ada di halaman feuilleton, boekan di advertentie. Tapi segala apa ada baeknja dan tida baeknja; lantaran ilmoe atoer advertentie semingkin madjoe, semingkin banjak orang jang djadi korban dari advertentie bagoes boeat barang….. d j e l e k.

Ini teroetama dirasaken di Amerika Sariket, jalah negri dari reclame jang paling modern. Stuart Chase dan F. J. Schlink doea taon berselang telah terbitken satoe boekoe jang menarik hati, jalah ,,Your Money’s Worth” atawa „Harganja Kaoe poenja Doeit” jang kasi roepa-roepa nasehat pada publiek berhoeboeng dengen oeroesan advertentie.

Ini boekoe lakoe keras seperti koewe dan sekarang kadoea penoelis terseboet diriken satoe kantoor, speciaal boeat kasi nasehat pada pembeli dan boeat tjega publiek kena dibohongin oleh advertentie. Ini kantoor jang didiriken oleh Stuart Chase dan F. J. Schlink pake nama „Consumers' Research Incorporation” dan letaknja ada di 340 W 23rd street, New York, Amerika Sariket. Boeat bisa dapet katerangan dari ini kantoor orang moesti djadi lid dari ini bureau dengen bajar $ 2 dalem satoe taon.